‘मन्त्रीबाट राजीनामा मागे, ज्यान पनि जान सक्छ भनेर धम्की आयो’ (भिडियो अन्तर्वार्ता)
काठमाडौं, श्रावण १ । सामान्य प्रशासनमन्त्री लालबाबु पण्डितले आफू नेपालको सम्मृद्धिका निम्ति लागिपरेको भन्दै यसमा जस्तोसुकै अवरोध आएपनि सामना गर्न तयार भएको बताएका छन् ।
उनले आफूले डीभी/पीआर/ग्रीनकार्डसम्बन्धी कुरा उठाउँदा विरोध गर्नेहरु पनि अहिले उक्त विषयमा सकारात्मक रहेको बताए । इमेज टेलिभिजनको साप्ताहिक कार्यक्रम ‘अलगधार’माकुरा गर्दै मन्त्री पण्डितले डीभी/पीआर/ग्रीनकार्डसम्बन्धी व्यवस्था आउँदै गर्दा केही राष्ट्रसेवकले अन्य कारण देखाइ राजीनामा दिएको बताए । यसबारे यथार्थ तथ्यांक सार्वजनिक गर्ने उनको भनाइ छ ।
उनले भने–‘मैले सानो काम गरेको हुँ, राष्ट्रका निम्ति यसले परिणाम ठूलो दिन्छ ।’
मन्त्री पण्डितले यसअघिका मुख्यसचिवले मुख्यसचिव भएकै बेला, प्रधानन्यायाधीशले प्रधानन्यायाधीश भएकै बेला, राजदूतले राजदूत भएकै बेला डीभी/पीआर लिएको खुल्न आएकोसमेत बताए । यद्यपि, उनले ती व्यक्तिहरुको नाम भने खुलाएनन् ।
‘नेपालको इज्जत फाल्नेहरुलाई नेपालीले इज्जत गर्नु हुँदैन’–उनले भने ।
आफूले डीभी/पीआरको कुरा उठाउँदा मन्त्रीबाट राजीनामा मागिएको र आफूलाई ज्यान पनि जानसक्छ भनेर धम्की आएको पनि कुराकानीका क्रममा उनले स्मरण गरे ।
उनले सरकारी राष्ट्रसेवक कर्मचारीले आफ्नो जिम्मेवारी कुशलतापूर्वक निर्वाह गर्नुपर्ने पनि बताए ।
‘नेपाली हौं भन्ने आत्मगौरव गरौं, आफ्नो ड्युटी निर्वाह गरौं, नेपाल बनाउने जिम्मेवारी हाम्रै हो’–मन्त्री पण्डितले भने ।
उनले आफू औपचारिक जापान भ्रमणमा जाँदा त्यहाँका प्रधानमन्त्रीले ‘नेपालीलाई धनी हुन मनै छैन’ भनेर नेपालसम्बद्ध गरेको टिप्पणीको पनि स्मरण गरे ।
मन्त्री पण्डितले राष्ट्रसेवक कर्मचारी, डीभी/पीआरसम्बन्धी नयाँ ऐनलगायतका विषयमा केन्द्रित रहेर ‘अलगधार’मा आफ्ना कुरा राखेका हुन् । (पूरा अन्तर्वार्ताका लागि भिडियो हेर्नुहोस्) ।
0 comments:
Post a Comment